Bizning o‘quvchilarimiz tarbiyali, milliylik ruhiyatiga to‘yingan, ajdodlarining, jadidlarining jo‘mardlik tabiatini meros qilib olgan, ota-onasiga va ustozlariga doimo hurmatda bo‘ladigan, insonparvarlik ruhiyatida shakllangan yoshlardir. Xulq-atvor jihatidan qat’iyatli, tez moslasha oladigan, muammolarga yechim topishga intiluvchan, muomala madaniyatini egallagan, mehnatkash, samimiy, vazmin va liderlik qobiliyatlarini o‘zlarida mujassamlashtirgan yigit qizlardir. Ular o‘z navbatida mustaqil qaror qabul qila oladigan va uning mas’uliyatini o‘z zimmalariga oladigan, matonat va chidamlilikka moslashgan liderlar bo‘lib shakllanadilar.

Bizning o’quvchilarimizning jamiyatida inson qadri, jamoaviylik, o’zaro hurmat, ijtimoiy faollik muhim o’rin egallaydi. Shu bilan birga, san’at: rassomchilik, haykaltaroshlik, bo’yoqchilik, musiqiy asbobni ijro etish, qo’shiq kuylash, raqs, adabiyot, she’riyat va shu yo’nalishlar asosida o’tkaziladigan tadbirlar orqali yoshlarimizda kreativlik (yangiliklarga qiziquvchanlik va yaratuvchanlik) kayfiyatini jadal rivojlantirishga alohida urg’u qaratiladi.

Jismonan sog‘lom bo‘lish bu albatta ta’lim jarayonida diqqatni bir joyga jamlay olish, darslarda doimo faol bo‘lish, yuqori energiyani uzoq muddat ushlab tura olish va uni albatta sarflay olish, stressni to‘g‘ri boshqarish, darslarning davomati doimo yuqori bo‘lishi (sog‘lom bola kamroq kasal bo‘ladi) va ijobiy raqobat hissini ta’minlab berishda yordam beradi.

An’anaviy ta’limda o‘quvchilar fanlarni chuqur o‘zlashtirishlari, uyga vazifalarni to‘liq o‘rganib bajarishlari, mavzularning tub mohiyatini anglashlari, dars qilishni majburiyat sifatida emas, balkim sevib darslarini qilishliklarini imkoniyati va sharoitini ta’minlashdan iborat. Muvaffaqiyat ortida mashaqqat bo‘lishini tabiiy ekanligini singdirish.

O‘quvchilar o‘zlashtirayotgan bilimlarini amaliyotda tatbiq etishlari, doimiy tarzda tanqidiy fikrlash yondashuvida “nega?” degan savollarni o‘zlariga ko‘p berishliklari va bunga javobni nafaqat kitoblardan, shu bilan birgalikda hayotdan, atrofimizdagi olamdan ham qidirishliklari, talab va taklif ehtiyojlarini tahlil qila olishliklarini ta’minlash ustuvor maqsadlarimizdan biridir. Shu bilan birgalikda, “o‘quvchilar - e’tibor markazida” yondashuvi ostida aynan ularga mustaqil va keng ko‘lamli fikrlay olishlariga imkoniyat yaratib berish maqsadida, holatlar tahlili (maqsadli amaliy tashriflar) dasturini ta’minlash. O‘z navbatida ushbu jarayonlar o‘quvchilarimizga jamiyatga daxldor insonlar bo‘lib yetishishlariga, BMTining barqaror rivojlanish maqsadlariga asosan global masshtabda harakat qilishlariga va shunga mos tarzda qarorlar qabul qilishga undaydi. Shuningdek, o‘quvchilarda jamoaviy bajariladigan vazifalar, mustaqil ishlar, taqdimot loyihalarini vazifa qilib bergan holda, ushbu yoshlardan kelajakda samarali va kirishimli muloqot egalari, tavakkal qila oladigan bo‘lajak tadbirkorlar, jamoani to‘g‘ri boshqara oladigan liderlar, hayotiy ko‘nikmalarni egallagan yaxshi insonlar jamoasini shakllantirishni maqsad qilmoqdamiz.