UMUMIY QOIDALAR

Iqtidor Xalqaro Maktabining asosiy ustuvor vazifasi har bir bolaning jismoniy va ruhiy xavfsizligi hamda farovonligini ta'minlashdir. Tashkilotning barcha a’zolari bolalarga nisbatan har qanday zo‘ravonliklarni oldini olish, bolalarni holatidan xabardor bo'lish, bolalar manfaatini poymol qiladigan holatlar sodir bo'lganda munosabat bildirishlari va boshqalarni ham xabardor qilishlik majburiyatlarini o'z bo'ynilariga oladilar.
Mazkur Bolalarni Himoya qilish Siyosati maktabning bolalarni himoya qilish amaliyotlarini tartibga soladi va O‘zbekiston Respublikasining Oila kodeksi (08.05.2023 yilda yangilangan) hamda Birlashgan Millatlar Tashkilotining Bola huquqlari to‘g‘risidagi Konvensiyasi (1989 yil) talablariga muvofiqdir va mutanosibdir. Ushbu Siyosat xodimlar xulq-atvori kodeksi, o‘quvchilar xulq-atvori kodeksi, xavfsiz ishga qabul qilish siyosati va axborot xavfsizligi siyosatiga ham ta’sir ko‘rsatadi va ular bilan chambarchas bog‘liqdir.

ASOSIY TAMOYILLAR

Mazkur siyosatning asosiy tamoyillari quyidagilardan iborat:

1. Toqatsizlik - Maktab xodimlari, tashqi xizmat ko‘rsatuvchilar, maktabga tashrif buyuruvchilar va boshqa o‘quvchilar tomonidan bolalarga nisbatan zo‘ravonlik, haqorat, kamsitish va tahqirlashlarga toqat qilinmaydi va yuqoridagi holatlar qat’iyan ta'qiqlanadi. Har bir buzilish va noqonuniy harakat jazoga tortiladi.
2. Shaxsiy mas’uliyat - Barcha xodimlar ushbu Siyosatni amalga oshirish uchun mas'uldir va o‘quvchilarga nisbatan zo‘ravonlikning oldini olish hamda Siyosat buzilishlariga javob berish choralarini ko‘rishlari lozim.
3. Universallik - Mazkur Siyosat o‘quvchilar bilan muloqot qiladigan har bir shaxs uchun majburiy hisoblanadi.
4. O‘quvchilarning manfaatlari ustuvorligi - Har qanday sharoitda o‘quvchi manfaatlari birinchi o‘rinda turadi, ularning himoyasi, xavfsizligi va farovonligi, shuningdek, ularning jismoniy, ijtimoiy va psixologik ehtiyojlarini ta'minlash zarur.
5. Bag‘rikenglik - Maktablar o‘quv jarayonining barcha ishtirokchilari o‘rtasida o‘zaro hurmat, tushunish va iqtisodiy, madaniy, gender va boshqa farqlarni qabul qilishga asoslangan ijobiy muhitni yaratishga intiladi.
6. Xavfsizlik - O‘quvchilar xavfsizligi maktablarning ustuvor vazifasidir.
7. Maxfiylik - O‘quvchilarga nisbatan zo‘ravonlikka oid barcha tekshiruvlar va tergovlar o‘quvchilarni himoya qilish va ma'lumotlarning maxfiyligini ta'minlash uchun amalga oshiriladi.
8. Hurmat - O‘quvchilarning huquq va qadr-qimmatini, tanlovlarini, ehtiyojlari va istaklarini hurmat qilish maktab tomonidan qabul qilinadigan qarorlar uchun asos bo‘lishi kerak.
9. O‘z vaqtida harakat qilish - Zo‘ravonlikning oldini olish, aniqlash, tergov qilish va unga javob berishda o‘z vaqtida chora ko‘rish ta’minlanadi.
10. Hamkorlik - Maktab mazkur Siyosatni amalga oshirish va o‘quvchilar uchun xavfsiz muhitni ta’minlash maqsadida tashqi tashkilotlar bilan hamkorlik qiladi.